Plaaslike Vroue Landbou Unie (VLU) vroue het die jaar afgesluit met ‘n besoek aan Ouma se Huis museum op die FAK Udolpho Rivierplaas buite Parys.

As herinneringe aan toeka se tye jou ná aan die hart lê, soos ‘n koppie Boeretroos in die hand en die reuk van varsgebakte brood wat syfer deur die koolstoofhortjies, dan is die plaasmuseum ‘n lewende herinnering saamgestel uit erfstukke en jare se versamel en bymekaarmaak.

Die vroue het die besoek as ‘n belewenis beskryf om te sien hoe geskiedenis hier bewaar word.

Hulle het ook die FAK se Sentraal Kultuurkoördineerder, Jan-Danie Malan, se passie vir bewaring van taal en geskiedenis uitgesonder en gesê dat mense die toekoms by Udolpho moet omhels met ‘n positiewe bewusmakingsveldtog vir die bewaring van ‘n eie taal en geskiedenis.

Daar is die oggend heerlik saam geëet en gekuier.

Die VLU begin weer in Februarie 2025 met sy jaarprogram. Gaste is welkom.

Skakel Bernadet van der Ende by 082 474 0304, of Annatjie Dreyer by 082 464 0204 vir meer inligting oor die VLU byeenkomste.