Wenskuiwe is op 7 en 8 Desember deur Parys se skaakspelers gemaak wat Sedibeng by die Gauteng Interstreke Volwasse en Senior skaaktoernooi verteenwoordig het. Boonop is geskiedenis deur Desmond Theunis, ‘n inwoner van Vredefort gemaak, toe hy die eerste gesiggestremde speler was om Sedibeng by die interstreektoernooi te verteenwoordig.

Willem Erasmus en Ernest Phakoe het saam met hul A-spanlede goud verower, en eindig as algehele wenners van die senior-afdeling. Die span kon ook twee bordpryse inpalm waarvan een deur Willem gewen is. Ernest het ‘n skitterende drie uit vyf van sy wedstryde gewen.

Tshediso Ramabodu het vier van sy vyf wedstryde vir die B-span gewen en ook die algehele bordprys verower vir al die deelnemende senior spanne. ‘n Merkwaardige prestasie.

Werner Ernst en Desmond Theunis, met Danny Botes as reserwe, het ten spyte van baie strawwe kompetisie, uitstekend gevaar op die bord vir die B-span.

‘n Totaal van 1 200 spelers van Johannesburg Metro, Tshwane, Wesrand, Dr Kenneth Kaunda, Sedibeng en Ekurhuleni het aan die toernooi deelgeneem, met vier spelers per span. Sedibeng het in totaal 135 spelers by die toernooi gehad.

Parys se skaakspelers wat deelgeneem het aan die toernooi sê dankie aan die borge wat gehelp het met toegangsgeld en die koste vir vervoer. Spesiale dank aan ‘n anonieme speler van die Dassiepad-groep, Willem, Sedibeng Chess se Hannes Mittermaier, Andries, Irene en Angi, Natasha vir die borgskap by TDC Technology Driven Concepts (pty) Ltd, en Andre Theron en Hannes Mittermaier vir hul ondersteuning om die Parys spelers aan boord te kry.