Kruistog 2025

Elke jaar as die groep passievolle mense uit verskillende kerkagtergronde skouer aan die wiel sit vir die voorbereidings vir dié groot dag, neem die Kruistog sy eie karakter aan.

Hierdie jaar word daar ‘n vlot gebou van ‘n groot kroon wat die koningskap en heerskappy van Jesus Christus voorstel.  Die vlot met die groot kroon gaan deur ‘n trekker gesleep word wat deur Valtra geborg word, en sal die Kruistoggangers lei op die 3km roete deur die strate van Vredefort wat begin en eindig by die dorp se sportgronde.

Vanjaar gaan daar ook ‘n ligtoring  in Vredefort gebou word – wat sover bekend die enigste
ligtoring in die Vrystaat sal wees. Planne is reeds op die tafel om hierdie ligtoring op te rig by
Cornerstone Pub & Grill, by die Parys-ingang van die dorp. Hierdie toring gaan uit klippe gebou
word wat van verskillende plase in die Vredefort Koepel af kom.

“Dit gaan ‘n pragtige tentoonstelling wees van die verskillende klip-formasies wat in die Vredefort Koepel voorkom, en boere word genooi om allerhande soorte klippe van hulle plase af te bring vir die bouwerk
aan die ligtoring, wat hierdie week ‘n aanvang neem.

Die doel van die ligtoring is egter groter as dit. Dit is om “Jesus Christus, die Lig van die Wêreld” uit te beeld. ‘n Gedenksteen sal op die fondasie aangebring word wat die boodskap uitdra, en ‘n regte flitsende vuurtoring-lig gaan in die bokant van die toring aangebring word om almal daaraan te herinner soos wat hulle Vredefort binnekom, sê Juan Greeff, een van die organiseerders. .

“Die Kruistog is ‘n gemeenskapsprojek, aangebied deur die gemeenskap, en ter wille van die
gemeenskap. Daarom wil ons graag almal uitnooi om op watter wyse ookal, betrokke te raak.
Die afgelope weke word daar al hard gewerk om die blomme te vou, gras te sny, blomme te plant, skoon te maak, vlot bou, en nog baie meer. Die vroue bou “stasies” op die roete  wat verskillende uitbeeldings uit
die lewe en bediening van Jesus voorstel. Die jeugspanne gaan meer as 500 kruise bou om uit
te deel vir mense om te dra op die Kruistog-roete. Wildsplase stuur hulle wildsvoertuie vir ouer mense om te kan deelneem en nie kans sien om die roete te stap nie,” sê Juan.

As jy betrokke wil raak, gesels met Juan by 079 874 1860.

Die Kruistog is heeltemal gratis vir almal wat dit bywoon. Elkeen kry ‘n
nagmaalpakkie met aankoms, en elke gesin ontvang ‘n sleutelhouer van die Kruistog by die eindstreep.

“Ons maak staat op God se voorsiening vir finansies deur die besighede, boere, en privaat persone van ons omgewing. Ons is dankbaar vir elkeen wat op hierdie manier ‘n belegging maak in God se Koninkryk. Maak seker jy is vroeg in Vredefort op die 18de April, en kom beleef Paasfees soos nêrens anders nie!,” nooi die organiseerders.

Wat bring jy saam vir Die Kruistog?
‘n Hoed en sonskerm (sambreel is dalk ook ‘n opsie)
‘n Kruis (tuisgemaak of gekoop, enige vorm of grootte) as jy kan. Kruise sal ook beskikbaar wees.
‘n Paar rand (vir die kos- en koeldrankstalletjies)
Gemaklike klere (die drag is informeel)
Gemaklike stapskoene

Nog datums waarna jy kan uitsien

5 April – Dorp-skoonmaakdag

12de April – Kruisbou-dag