Talle besoekers het die naweek weer die rustigheid van die platteland kom geniet met ‘n besoek aan Parys oor die Paasnaweek. As ‘n bonus kon die geskiedkundige 1919-hangbrug net voor die langnaweek weer oopgemaak word vir voetgangers nadat dit in Desember gesluit is toe ontdek is dat een van die brugkabels met verloop van tyd verweeer en gebreek het.

Daar is lank koppe bymekaar gesit, en  het inwoners van die dorp wat die afgelope twee jaar uit eie sak die brug en omgewing om die brug skoon en netjies hou, bygedra om  die brug weer te kon beveilig sodat voetgangers soos tevore veilig oor die brug kan beweeg.

Die brug is vir dekades al een van Parys se grootste toeriste-aantreklikhede.

‘n Besoek aan die brug beloon toeriste nie net met die geleentheid om ‘n spesiale foto by die fotoraam te neem met die bekende brug in die agtergrond nie, maar is daar ook die Mur de Souvenirs waar jy jou slot kan hang.

Stap jy hier langs die rivieroewer, val dit jou op hoe netjies die gras gesny is op die oewer,vanaf die brug tot by die Esplenade. Selfs die toegegroeide middelman, is sedert Februarie mooi gemaak met die hulp van hierdie inwoners wat uit eie sak omsien dat hier netjies gehou word ter wille van die dorp met die hulp van Phillip van KellRoy Tuindienste.

‘n Pluimpie in die hoed vir hierdie omgee om ‘n verskil te maak.

Dankie vir inwoners se omgee om hier netjies en skoon te hou.