Polisiewoordvoerder brigadier Athlenda Mathe het pas bevestig dat die ondersoek na drie vermiste Vrystaatse polisiekonstabels hul na die Hennopsrivier langs die N1 by Centurion gelei het waar drie liggame  uit die rivier gehaal is. Die identiteite van die oorledenes is nog nie bevestig nie, het brig. Mathe gesê.

Mathe sê daar word nog gesoek na ‘n vierde liggaam en vir moontlike bewysstukke wat die polisie kan help in hul ondersoek na die vermiste polisiebeamptes.

Konstabels Cebekhulu Linda (24), Keamogetswe Buys (30) en Boipelo Senoge (20) was van Bloemfontein op pad na Limpopo waar hulle ontplooi is, en is Woensdag die laaste keer by die Engen-vulstasie naby die Grasmere-tolhek op die N1 gesien. Hulle het met n wit Volkswagen Polo gery, en was van diens toe hulle verdwyn het.

Die Nasionale Kommissaris van die SAPD, genl. Fannie Masemola, het gister saam met die adjunk nasionale kommissaris vir misdaadondersoeke, luitenant-generaal Shadrack Sibiya, en die ondersoekspan vergader en  met die families van die betrokke polisielede gepraat.

Twee van die vermiste polisiekonstabels, na wie daar sedert Woensdag gesoek word.