Motoriste word ernstig gewaarsku om baie stadig en versigtig te bestuur op die R59  sowat 1km vanaf die Parys-vliegveld in die rigting van Sasolburg, waar nooddienste steeds op die toneel besig is met opruimingswerk na ‘n botsing waarin drie voertuie vroeër vanaand betrokke was.

Beide bane was vir verkeer gesluit nadat ‘n Hyundai motor, ‘n vragmotor met sonneblom, en ‘n transitovoertuig van Fidelity in die botsing betrokke was.

Die vragmotorbestuurder en ‘n insittende van die Hyundai voertuig is per ambulans na die Parys Distrik-hospitaal vervoer met  onderskeidelik ligte beserings en ‘n arm fraktuur.

Beide insittendes van die transitovoertuig is ernstig beseer en per noodhelikopter van die toneel na die Netcare Alberton-hospitaal vervoer.

Nog ‘n pasiënt is met  ligte beserings per ambulans na die Vaalpark-hospitaal vervoer.

Nooddienste is tans nog besig met herwinning van die vragmotor se vrag in die veld langs die pad.

Verkeer kan tans verby die toneel beweeg met ‘n stop/ry-punt wat ingestel is.

Opruimingswerk op die toneel sal na verwagting egter nog ‘n paar uur duur.

• Let asseblief ook daarop dat daar baie groot en gevaarlike slaggate op die R59 tussen Parys en Vaalpark is, en dat dit belangrik is dat jy spoed moet verminder en volgafstande moet handhaaf veral wanneer sig bemoeilik word.