Baie harde werk en toewyding het die kroon gespan vir Hoërskool Parys se toppresteerder van die 2025 matriekklas, wat spog met agt vakonderskeidings sowel as ‘n onderskeiding vir IEB Gevorderde Wiskunde.

Die skrander jongman wie se droom dit sedert graad 10 is om Veeartsenykunde aan die Universiteit van Pretoria te gaan studeer, glo dat daar geen kortpad vir akademiese sukses is nie. Jy moet eenvoudig gaan sit en leer.

Reinhard het naas die IEB Gevorderde Wiskunde, sy onderskeidings behaal in Afrikaans huistaal, Engels eerste addisionele taal, rekeningkunde waarvoor hy ‘n verstommende 100% behaal het, wiskunde, lewenswetenskappe, fisiese wetenskappe waarvoor hy 96% gekry het, rekenaartoepassingstegnologie,  en lewensoriëntering.

Reinhard vertel dat hy sedert hy in graad 10 was begin het om by die Parys Dierehospitaal te help. Van die eerste dag wat hy daar was, het hy besef dat veeartseny sy passie is. Juis daarom was dit vir hom belangrik om goed te doen in sy matriekeindeksamen met die oog op keuring vir sy studies.

Reinhard het naas sy uitmuntende akademiese prestasie, ook nog sy tyd so bestuur dat hy selfs op die tennisbaan uitgeblink het. Hy is verlede jaar ingesluit in die Vrystaat-tennisspan.

Beide Reinhard se ouers, Anton en Marilize, is ingenieurs van beroep.

Hoërskool Parys se matrikulante van 2025 het ‘n 96,8% slaagsyfer behaal en spog in totaal met 58 A-simbole.

Benewens Reinhard se prestasie het vier van die skool se matrieks elk drie A-simbole ingepalm. Die matrikulante is George Marais, Heather Davies, Jennifer Edwards en Courtney Staines. Nege van die skool se matrieks het elk twee A-simbole verwerf.

Die 2025-matriekklas het nasionaal ‘n slaagsyfer van 88% behaar wat die hoogste is wat nog sedert die instelling van die huidige Nasionale Senior Sertifikaat Stelsel (NSS), behaal is.

Nasionaal het die Vrystaat se matrieks die naasbeste gevaar met KwaZulu Natal in die topposisie.