Inligting sit polisie op die spoor van vermeende skaapdiewe
Twaalf skaapkarkasse is by die verdagtes gekry, en nog vier karkasse op die plaas waar die skape gesteel is.
Vier vermeende skaapdiewe is gisteroggend (Vrydag 10 April) naby Viljoenskroon deur lede van die Fezile Dabi Distrik Infrastruktuur Taakspan gearresteer.
Polisiewoordvoerder sersant Josephine Rani, sê lede van die Kroonstad Infrastruktuur-span het Donderdagaand inligting gekry oor individue wat na bewering beplan om skape van ‘n plaas langs die Vredefort/Kroonstad-pad te steel.
Die inligting is opgevolg en het polisielede omstreeks 05:30 Vrydagoggend ‘n verdagte bakkie sonder registrasienommers op die R76 naby Viljoenskroon opgemerk. Die voertuig is naby een van die plotte tot stilstand gebring, waar die vier verdagtes met 12 skaapkarkasse in hul besit gekry is.
Verdere ondersoek het die polisie na die plaas gelei waar die skape gesteel is, en is nog vier skaapkarkasse gekry.
Die verdagtes tussen die ouderdom van 43 en 49 sal in die Kroonstadse landdroshof verskyn op klagte van veediefstal het Rani gesê. Die polisie het ook beslag gelê op die voertuig wat tydens die misdaad gebruik is.
