Hekmotor-diefstal word toenemend ’n probleem met misdadigers wat woongebiede en besighede teiken.

Die polisie het egter ‘n groot deurbraak vanoggend, Maandag 1 Junie) in die Rustenburg-omgewing gemaak waar agt vermoedelik gesteelde hekmotors op beslag gelê is.

Adjudant-offisier Ofentse Mokgadi sê die polisie het inligting ontvang oor ’n wit BMW wat na bewering by hekmotordiefstalle in die Rustenburg-omgewing betrokke was. Die voertuig is deur Blitspatrollie-lede opgespoor waarna die bestuurder van die voertuig probeer vlug het.

Die polisie het egter daarin kon slaag om hom voor te keer en is die 34-jarige man gearresteer op klagte van die besit van vermoedelik gesteelde eiendom.

Met die arrestasie het die polisie agt hekmotors met ’n beraamde waarde van R80 000 teruggevind. Daar word vermoed dat die hekmotors kort ná middernag gesteel is. ’n Gereedskapstuk wat na bewering gebruik is om die motors te verwyder, is ook gevind, en is beslag gelê op die BMW nadat vasgestel is dat dit vals nommerplate het

Die polisie doen ’n beroep op gemeenskapslede wat onlangs slagoffers van hekmotordiefstal geword het, om te help met die identifisering van die teruggevonde eiendom.

Die verdagte sal na verwagting binnekort in die Rustenburg-landdroshof verskyn.

Charnel Hattingh, Groephoof van Bemarking en Kommunikasie by Fidelity ADT, sê ‘n florerende mark vir hekmotoronderdele dryf hierdie misdaad aan.

“Gesteelde hekmotors word dikwels uitmekaar gehaal, met komponente soos batterye en ratkaste wat individueel verkoop word, of as volledige eenhede aan niksvermoedende huiseienaars herverkoop word,” verduidelik sy.

’n Kommerwekkende taktiek wat ook deur misdadigers gebruik word is om die hekmotor se outomatiese funksie te deaktiveer om maklike toegang tot eiendomme te verkry.

Hoe om jou hekmotor en eiendom te beskerm:

• Maak seker jou hekmotor is te alle tye binne ’n geslote staalomhulsel of -raamwerk beveilig. Onbeskermde motors—veral dié naby palissade-tipe hekke—is maklike teikens
• Installeer 180-grade perimeterstrale om beweging naby jou hek te monitor
• Installeer anti-lig-hakies en sweis ’n plat staaf aan die hekrak om geforseerde oplig te voorkom
• Kombineer meganiese beskerming met elektroniese oplossings wat waarskuwings stuur wanneer daar daarmee gepeuter word

Hattingh beklemtoon dat jou elektriese hek as ’n kritieke eerste verdedigingslinie moet dien.

“Aktiveer vroeë waarskuwingstelsels soos tuinstrale of elektriese heinings, en maak seker dit is aan gewapende reaksiedienste gekoppel. Ons almal moet ’n rol speel om misdaad te verminder deur dit moeiliker vir misdadigers te maak om te werk,” sluit sy af.