Die waaksaamheid van ‘n lid van die publiek het gelei tot die inhegtenisneming van drie verdagtes in Bronville naby Welkom, nadat ‘n man met veelvuldige beserings in die kattebak van die motor waarmee die mans gery het, gekry is.

Sersant Palesa Thabana sê die polisie het Sondagogged (28 Junie) ‘n klagte gekry oor ‘n bakleiery in Bronville. Daar gekom het hulle inligting gekry dat ‘n man in die kattebak van ‘n silwer BMW toegesluit is. Polisiebeamptes het die betrokke voertuig met drie insittendes, onmiddellik voorgekeer en deursoek.

Hierop is die bebloede man in die motor se kattebak gevind. Die slagoffer het ernstige veelvuldige beserings opgedoen en sterk na petrol geruik. Hy is na ‘n hospitaal geneem vir mediese ondersoek en behandeling.

Met verdere ondersoek het die polisie bloed aan die verdagtes se hande en tekkies opgemerk.

Volgens inligting het die verdagtes die slagoffer by sy woning aangerand nadat hulle hom daarvan beskuldig het dat hy hul motoronderdele gesteel het. Hulle het na bewering petrol oor hom gegooi en hom met geweld in die kattebak van hul voertuig gedwing, en toe met hom weggery.

Die polisie het twee pare bloedbevlekte tekkies, asook die voertuig wat na bewering tydens die misdaad gebruik is, gekonfiskeer. Die gekonfiskeerde items is as bewysstukke ingehandig vir verdere ondersoek.

Die drie mans, onderskeidelik 25, 27 en 40 jaar oud, is daarna in hegtenis geneem op aanklagte van poging tot moord en ontvoering. Hulle sal binnekort in die Welkom-landdroshof verskyn.