Feesvure sal die naweek van 24 tot 26 September hoog brand in Parys wanneer dié dorp sy 150ste bestaansjaar in kleur en klank vier, met egte plattelandse hartlikheid – dit waarvoor die dorp alom
bekend is.

Kom stof jou feesvere af vir ’n kleurvolle straatparade op Nasionale Erfenisdag, 24 September, in die hoofstraat tussen Unieen Wesstraat. Vandaar beweeg die parade via Waterstraat na die oop terrein langs die brandweer, waar ’n verskeidenheid kosstalletjies in die feestent jou gaan bederf. ’n Wyn- en ginproe word ook in die vooruitsig gestel.

Die gedagte met die straatparade is dat besighede vir die duur van die parade hul ‘besigheid’ na die parade sal bring. Kunstenaars wat op die sypaadjie skilder, restauranttafels
waar mense op die sypaadjie die parade kan geniet, en sakelui wat deel is van die viering op winkelstoepe en waar voete beweeg.

Dit is hier waar Parysenaars kan kom wys wat die dorp bied – dansers, gimnaste, modelle, kunstenaars, digters, skrywers, sportklubs en handwerkgroepe.

As jou besigheid nie in Parys se hoofstraat is nie, kan jy steeds ’n toerismebanier borg en aansluit by die feestema om Parys rooi, wit en blou te tooi vir ’n viering van die dorp en sy mense. Die feesviering word
deur Parys Info & Tourism georganiseer.

Gesels met die personeel by Parys Info by 056 811 4000 of per WhatsApp by 067 278 2860. Jy kan ook die Info-kantoor by Breëstraat 85 (regoor die polisiestasie in Parys se hoofstraat) besoek om jou idees vir die parade te deel, of hand by te sit met die feesreëlings. Kyk ook op die webtuiste, https://parysinfoandtourism.co.za/ na wat beplan word sodat jy nie uitmis op ’n feestelikheid wat net een keer in 150 jaar gebeur nie.

’n Naweek se gholf op Parys se uitsonderlike bane

Die fees eindig nie op 24 September nie. Op 25 en 26 September word ’n Parys 150 Erfenis-gholfnaweek op beide Parys se spoggholfbane, Vaal de Grace en Parys Golf & Country Estate, aangebied. Die Better Ball Alliance – 2 Scores to Count – word in egte Franse flair in rooi en blou gespeel.

As jy wil deelneem, registreer op die toepassing https://playgolfdays.co.za/ of op Google Play Store by https:// playgolfapp.co.za.

As jy nie kan speel nie, borg ’n gaatjie, ’n goodiebag, ’n prys of ’n item vir die veiling. Skakel Selma by 083 232 0480 as jy as borg wil deelneem, of stuur ’n WhatsApp met navrae na 084 269 2493.

Inskrywingsvorms vir die toernooi is op die webtuiste https://parysinfoandtourism.co.za/ beskikbaar.

Sokker en basketbal

Die feestelikheid word later voortgesit met die Parys 150 Legends Football Tournament, wat op 3 Oktober by die Fezile Dabi-stadion in Tumahole gehou word en skole sal betrek.

Die Parys Panthers bied op 3 en 4 Oktober ’n basketbaltoernooi aan, met ses spanne wat na verwagting aan die Parys 150 Basketball Tournament sal deelneem.

Die Parys 150-fees is ’n viering van die dorp en sy mense. Daarom is elke Parysenaar se betrokkenheid nodig. Kom deel jou idees. Deel jou entoesiasme. Deel jou foto’s, en help om die woord te versprei sodat die feesvure hoog sal brand.