Na hul skof by Parys Mica het van die Mica-personeel weer vanmiddag moue opgerol om personeel van Parys Distrik-hospitaal te help om die hospitaal se Ongevalle-afdeling se mure en plafonne te verf. ‘n Ongelooflike inisiatief en omgee-ure om ‘n verskil te maak.

Wat sedert verlede Vrydag hier by die hospitaal gesien is waar die hospitaalpersoneel en Mica-personeel saamgewerk het om ‘n verskil te maak, gaan ‘n verskil maak vir elke pasiënt wat dié hospitaal se Ongevalle-afdeling besoek.

‘n Storie van omgee

Die hospitaalpersoneel wou graag die Ongevalle-afdeling weer netjies en mooi maak vir pasiënte, en is by Mica Parys aangeklop vir hulp met die verf.

Die personeel se geesdrif was so aansteeklik dat Mica Parys nie net gehelp het met wat nodig was nie, maar self ook na werk kom hand bysit het met die verwery. Van die begin af het Mica Parys en sy personeel die projek help verwesenlik. So het vele hande ligte werk gemaak – verlede naweek, maar ook vandag.

‘n Groot dankie

Die projek is gekoördineer deur Desmond Radebe, Gesondheid- en Veiligheidsbeampte by Parys Distrik-hospitaal, en Mitchell Gilliland, en verdien die hospitaal-personeel en Mica personeel ‘n groot dankie vir die inisiatief wat geneem is.

Hospitaalpersoneel werk dikwels in moeilike omstandighede, maar ‘n omgee-gemeenskap waar hande gevat kan word, maak ‘n wêreld se verskil.

Die foto’s hieronder is verlede Vrydag geneem.