Parys-rolbalklub maak vanjaar geskiedenis met die Veterane-kompetisie van die Noordwes Rolbal Meesterstoernooi wat vir die eerste keer in Parys aangebied word. Vier van Parys se spelers is boonop onder die elite spelers wat genooi is na die Ope en Veterane-kompetisies van die enkeltoernooi vir spelers wat volgens hul huidige spelrekord onder die room van die distrik se spelers gereken word.

Die Parysenaars wat deelneem is Dalena Reynecke, Dries de Jager en Jan Harmse wat aan die veterane-kompetisie sal deelneem wat op 1-2 Augustus by Parys-rolbalklub gehou word, en Poena Olivier wat dieselfde naweek aan die ope-kompetisie by Potch Country Club sal deelneem.

Toeskouers is welkom om die spelers te kom ondersteun. Daar is ‘n kontantkroeg op die perseel beskikbaar. Kom geniet die twee dae se spel saam met deelnemers.

Drie wedstryde word Saterdag 1 Augustus vanaf 09:00 gespeel, en twee wedstryde Sondag 2 Augustus. Die finaal word dan Sondagmiddag 2 Augustus beslis.

In beide kompetisies van die toernooi is slegs 12 mans en 12 dames genooi vir die Round Robin-kragmeting.