“Hoop vir ‘n beter more, ‘n blink toekoms, ‘n geseënd, beskermde lewe, ‘n diepe trots vir ons skool en hoop en lig op elkeen se toekomspad,”

Dit is die boodskap van die nuwe skoolhoof van Volkies. Die 44-jarige PW van Aswegen, gaan aanstaande jaar homself by die skool aansluit. Voorheen die hoof van Hoërskool Bultfontein, het van Aswegen vanuit die wêreld van finansiële bestuur na onderwys oorgeskuif omdat hy ‘n groot passie daarvoor het.

“Ek weet die Hemelse vader het my en my gesin hierheen gestuur om aan sy koninkryk te help bou. Mag sy naam altyd eerste in ons harte, doen en late wees. Mag elke Volkie, God se wil vir hulle lewe verwesenlik en dit werklik uitleef,” het Van Aswegen in die boodskap aan die skool gesê.

Gerhard Swart wat tot onlangs nog waargeneem het by die skool is in ‘n vorige verklaring deur die skool bedank vir sy leiding in dié tyd.