’n Passievolle voëlkyker en sy vrou sê hulle is Sondagoggend erg geskok deur ’n toneel van dooie voëls waarop hulle afgekom het.
Volgens Zies van Zyl, bestuurder van bewaring by die Vaal Voëlklub, het hy en sy vrou vroeg verlede Sondagoggend vanaf Vanderbijlpark op die R54 gery om voëls te gaan kyk toe hulle sowat 10km van Potchefstroom af op die grusame toneel afgekom het.
Daar was 16 dooie kolganse en wildemakoue langs die pad in swartsakke gestrooi.
“Wat ’n treurige gesig vir enige persoon wat goeie waardes aanhang en aktief bydra tot die bewaring van ons fauna en flora,” het Van Zyl gesê.
Volgens hom het dit gelyk of die voëls geskiet is en toe in swartsakke gegooi is. “Ek hoop die skuldige persoon sien dit en besef hoe ander landsburgers oor ons erfenis voel en nie sal toelaat dat dade van hierdie aard bewaringspogings in die wiele ry nie,” het ’n ontstelde Van Zyl gesê.