Die polisie het Woensdag beslag gelê op dwelms en toerusting ter waarde van ongeveer R250 000 op ‘n plaas naby Klerkskraal. Dit nadat twee studente in hegtenis geneem is vir die besit van dwelms. ‘n Derde student is op die plaas in hegtenis geneem op aanklag van dwelmhandel.

Volgens ao. Mpho Manyoba, polisiewoordvoerder, is die studente, Renaldo Nortje en Johan Strydom (albei 22) op die hoek van Sol Plaatjie en Chris Hanistraat in hegtenis geneem nadat daar 87 gram dagga, vier pakkies “magic mushrooms” en dagga-olie deur konst. Gerhard Visagie in hulle besit gevind is.

Na ondervraging het die studente ’n plaas in die Klerkskraal-area uitgewys waar die dagga en sampioene gekweek word. Met hul aankoms op die plaas, het die polisie ongeveer 3 kg gedroogde dagga, 40 daggaplante en 100 gram “magic mushrooms” gevind.
Nog ’n student, Nico Heyns (22) is op die plaas in hegtenis geneem op aanklag van dwelmhandel. Heyns is op borgtog van R1 000 vrygelaat. Die saak is uitgestel tot 31 November. Beide Strydom en Nortje is op borgtog van R500 vrygelaat. Sover bekend is al drie dagstudente aan die Puk-kampus.