ʼn Man is gister naby Zeerust in hegtenis geneem nadat hy glo sy 4 maande oue baba so erg aangerand het dat die kind aan sy beserings beswyk het.
Volgens Kol. Pelonomi Makau, polisiewoordvoerder, is die polisie asook nooddienste gisteroggend omstreeks 05:00 na ʼn toneel geroep op ʼn klagte dat ʼn pa sy baba aangerand het.
Nadat daar met die ma van die kind kontak gemaak is, het sy glo aan polisie verduidelik dat sy en haar kêrel (die pa van die kind) Saterdagaand (4 November) ʼn onderonsie gehad het. Volgens die ma het sy die kind daar gelos en gevlug om hulp te gaan soek.
Met haar terugkoms Saterdagaand het sy gesien dat daar kneusplekke op die baba se gesig is. Die pa het glo gisteroggend weer die baba aangerand waarna die nooddienste ontbied is. Ongelukkig is die baba dood op die toneel verklaar.
Lt. Gen. Baile Motswenyane, provinsiale kommissaris het die voorval betreur.
“Dit is ontstellend dat ‘n kind deur sy eie pa vermoor is wat hom moes beskerm,” het sy gesê Sy het lede van die gemeenskap gemaan om hul verskille op ‘n vreedsame wyse op te los eerder as om geweld te gebruik.
Die Pa sal na verwagting Vrydag (10 November) in die Lehurutshelandroshof verskyn op aanklag van moord.
