ʼn Man wat vermoedelik in sy 30s was, is gistermiddag (14 Mei) dood nadat sy voertuig reg van voor met ʼn trok gebots het.
Volgens Russel Meiring, woordvoerder van ER24, het die ongeluk ongeveer 35 km buite Potchefstroom op die R54 (Vereenigingpad) plaasgevind.
“ER24-paramedici, saam met ander dienste, het op die toneel aangekom. ‘n Trok het in die linkerbaan van die pad gestaan terwyl die ander voertuig ‘n entjie ver langs die pad gevind is,” het Meiring gesê.
Die oorledene was vasgevang binne die voertuig. Hy het geen tekens van lewe getoon nie. Ongelukkig kon paramedici niks vir die man doen nie waarna hy dood op die toneel verklaar is.
Die bestuurder van die trok het geen beserings opgedoen nie.
Die presiese oorsaak van die ongeluk is nog nie bekend nie, maar die polisie was op die toneel om verdere ondersoek in te stel.
