Die jong man wat gister (13 Februarie) in ‘n kritieke toestand in die hospitaal opgeneem is, nadat hy in ‘n ernstige motorfietsongeluk betrokke was, is vanoggend (14 Februarie) oorlede.
Boodskappe van medelye het op Facebook vir Derick van Zyl (28) ingestroom.
“Jou hart was so goed en jou lewe se legkaarte het begin vorm neem,” het Bernice van Wyk op sy Facebookprofiel gesê.
Volgens Suzelle Myburgh, wat saam met Derick op universiteit was, was hy ‘n dierbare mens.
“Hy het altyd ‘n glimlag op sy gesig gehad en hy was die tipe persoon wat geluk daarin gevind het om mense om hom gelukkig te sien. Hy los ‘n groot leemte. My hart is so seer,” het Myburgh gesê.
Volgens Jacques Prinsloo was Derick soos ‘n broer vir hom. Hy was nog te ontsteld om oor sy vriend se dood te praat.
“Hy was ‘n yster,” het hy kortliks gesê.
“Rus sag my seun ek gaan jou baie mis. Jy was altyd saam my. Waar ma gegaan het, was jy daar. Vanaand is jy na jou Hemelse pa ek weet jou hart het jy vir Hom gegee. Ek gaan jou baie mis jou kamer is nou leeg. Eks baie lief vir jou,” het sy ma Erica op haar Facebookprofiel oor haar seun se dood gesê.
Volgens Ross Campbell, woordvoerder van ER24, het paramedici omstreeks 17:15 op die toneel gekom.
“Paramedici het die man ondersoek waarna bevind is dat hy nie asemhaal nie,” het Cambell gesê.
Paramedici het daarin geslaag om hom weer te laat asemhaal voor hy na Potchefstroom hospitaal geneem is vir verdere behandeling waarna hy in die vroeëoggendure oorlede is.
https://www.citizen.co.za/potchefstroom-herald/57953/motorfietsryer-kritiek-na-ongeluk-2/
