ʼn Jong man is in ʼn kritieke toestand gistermiddag (13 Februarie) hospitaal toe geneem nadat sy motorfiets met ʼn ander voertuig op die hoek van Govan Mbeki-rylaan en Mareestraat gebots het.

Volgens Ross Campbell, woordvoerder van ER24, het paramedici omstreeks 17:15 op die toneel gekom.

“Paramedici het die man ondersoek waarna bevind is dat hy nie asemhaal nie,” het Cambell gesê.

Gelukkig kon paramedici daarin slaag om hom weer te laat asemhaal voor hy na Potchefstroom hospitaal geneem is vir verdere behandeling. Die bestuurder van die ander voertuig is ongedeerd, maar ʼn 9-jarige seun wat in die agterste sitplek was, het klein beserings opgedoen. Hy is op die toneel vir klein snywonde behandel waarna hy na Mediclinic Potchefstroom geneem is vir verdere behandeling.

Die presiese oorsaak van die ongeluk is nog onbekend maar beide die polisie en plaaslike verkeersbeamptes was op die toneel om verdere ondersoek in te stel.