‘n 16-jarige seun het vandag (22 September) in die Bloemhof landroshof verskyn op aanklagte van moord op ‘n vier-jarige dogtertjie.

Volgens Brigadier Sabata Mokgwabone is hy gister (21 September) in hegtenis geneem.

“Hy is deur ‘n plaaslike pastoor aan die polisie oorhandig nadat hy glo erken het dat hy ‘n jong dogtertjie vermoor het, en haar lyk in die bosse naby Boitumelong gelos het. Die ondersoek duur voort,” het Mokgwabone gesê.

Die vier-jarige dogtertjie is Sondagmiddag as vermis aangemeld. Volgens Mokgwabone het sy saam met ander kinders buite haar ouers se huis gespeel toe sy weg geraak het. Inligting is later ontvang dat sy saam met ‘n man langs die N12 naby Boitumelong gesien is.

Die tiener sal na verwagting weer op 14 Oktober in die hof verskyn. Hy bly in aanhouding.