‘n Likkewaan het homself in Hoffmanstraat tuis gemaak.

Volgens Trudie Botha, eienaar van Electro sekuriteit, is die reptiel gewaar by ‘n kompleks waar diè firma wagdiens doen.

Volgens haar spook hulle al sedert gister (13 April) om die dier gevang te kry.

“Natuurbewaring gaan iemand stuur. Ons glo hy het ‘n gat daar,” het Botha verduidelik.

In Suid-Afrika kom daar net 2 spesies voor, naamlik die water- of nyllikkewaan (Varanus niloticus) en die berg- of kliplikkewaan (Varanus albigularis). Die nyllikkewaan kom oor die hele land naby water voor.

Hy kan tot ‘n uur lank onder die water bly en leef hoofsaaklik van mossels, krappe en krokodileiers, maar ook van enige ander klein lewende diere. Pasgebore nyllikkewane is ongeveer 23 cm lank en volwasse diere bereik ‘n lengte van 1,8 tot 2 m. Die kliplikkewaan (Varanus albigularis) is kleiner as die nyllikkewaan (1,2 m) en kom hoofsaaklik in die savannes en oop bosveldgebiede voor, en word selde by water aangetref.