Die Noordwes Universiteit se inwoning en voedseldienste-afdeling het op Dinsdag, 30 Augustus ‘n groot glimlag op Laerskool Vyfhoek se gesigte gebring toe elke kind en personeellid heerlike roomys gekry het.

Foto’s: Verskaf

Hierdie was deel van ‘n uitreik om die NWU se omgeehart vir hierdie skool te toon, wat die afgelope twee weke die erge tragedie van die Vyfhoek ongeluk nog verwerk.

Op Donderdag, 18 Augustus, is vyf Vyfhoek leerders oorlede toe ‘n vragmotor deur die skool se heining geploeg het.

Volgens Greg Roberts, die bestuurder van Inwoning en Voedseldienste by die NWU, was die roomys ‘n hoogtepunt vir die kinders gewees.

“Ons was in die bevoorregte posisie om ‘n oormaat roomys te hê, nadat een van ons verskaffers vir die NWU se Lentedagvieringe 3000 roomyse geskenk het. Ons het toe besluit om van hierdie roomyse uit te deel by die skool. Die kinders het die ongelooflik waardeer,” noem Roberts.

Hierdie is net nog ‘n voorbeeld van hoe die gemeenskap van Potchefstroom saamstaan en hoe besighede, instansies en inwoners ‘n verskil kan maak.

Daar word ook op Dinsdag, 6 September ‘n pretaksie by die skool beplan wat die NWU se SJGD beplan.