Kiesers wat aansoek gedoen het om spesiale stemme en wie se aansoeke goedgekeur is, kry vandag en môre (2 en 3 November) die geleentheid om te stem voor stemdag.

Die spesiale stemproses bied aan goedgekeurde kiesers die geleentheid om reeds voor die amptelike verkiesingsdag hul stemreg uit te oefen. Dit sluit kiesers in wat by hul stemlokale gaan stem, asook diegene wat vooraf toestemming gekry het om tuis te stem.

Kiesers word versoek om seker te maak dat hulle voorbereid is en van hul stemgeleentheid gebruik maak. Stemlokale sal op albei dae vanaf 08:00 tot 17:00 oop wees. Kiesers moet by die stemlokaal waar hulle geregistreer is, gaan stem en ‘n geldige Suid-Afrikaanse identiteitsdokument toon.

Kiesers wat vir ‘n tuisbesoek goedgekeur is, moet by die adres wat op hul aansoek aangedui is, beskikbaar wees totdat OVK-amptenare opdaag.

Die spesiale stemme vind plaas voor die amptelike plaaslike regeringsverkiesing op Woensdag 4 November.

Jou munisipaliteit. Jou toekoms. Jou stem. Maak seker jou stem word gehoor.