Die waterkrisis wat die afgelope twee weke vir inwoners in die noorde van Potchefstroom ‘n groot kopseer was, blyk om stelselmatig te verbeter.
Die Vyfhoek reservoir se vlakke het sedert Sondag, 2 Oktober na 45% gestyg.
Dit was voorheen gedurende die waterkrisis so laag as 3% verlede week.
Die Vyfhoek reservoir verskaf water aan onder andere, Vanderhoffpark, Mooivalleipark, Tuscany Ridge en Bailliepark.
Talle huishoudings het sonder water gesit en was weer eens nes verlede maand weer afhanklik van watertenkwaens wat in en om hierdie gebiede gestasioneer was.
Volgens die JB Marks munisipaliteit was die hoofredes vir die krisis aanhoudende beurtkrag wat verhoed het daar genoeg water ingepomp kon word om die uitvloei teen te werk.
Die kragopwekkers glo ook nie ontwerp is om water vir lang ure teen volle kapasiteit te pomp nie.
“Gebiede wat water van die Ikageng-Wes-reservoir ontvang, soos dié rondom Ikageng en Ikageng Proper, sal steeds watertekorte ervaar as gevolg van die meganiese onklaarraking by die pompstasie waaroor inwoners alreeds ingelig is.
Die JB Marks Plaaslike Munisipaliteit se tegniese span bly werk aan die oplossing van die probleem,” het JB Marks woordvoerder, Jeanette Tshite, genoem.
Munisipale beamptes en tegniese spanne het die waterlyne ook ondersoek en na verskillende kommerpunte en lekkasies gekyk. Die munisipale bestuurder het ook met Eskom gereël om tydelik die suiweringswerke van beurtkrag te isoleer. By die suiweringswerke is ’n bystandspomp ook op die 450mm lyn aangeskakel om ten einde die reservoir-vlakke te verhoog.
VF plus raadslid, Ian de Villiers, het bevestig dat die Vyfhoek opgaartenks te vlakke aansienlik verhoog het.
“Die Vyfhoek opgaartenks se vlak was volgens die stelsel teen 16:45 (Maandag, 3 Oktober) op 45% en die kragopwekkers het by Eskom oorgeneem. Baie dankie ook aan elkeen wat hierdie krisis van die afgelope twee weke met die grootste grasie hanteer het en vir elkeen wat baie skraal om gegaan het met die water ten einde almal se krane weer vol te kry. Dit bewys dat Potchefstroom kan saamstaan,” noem De Villiers.
