‘n Potchefstroomse tiener en leerder van Hoërskool Die Wilge, Zuan Davids (15), is sedert Vrydag, 2 Junie, vermis.

Hy is Vrydagoggend omstreeks 06:20 laas gesien in Potchefstroom waar hy ‘n swart baadjie en blou jeans aangehad het. Hy het nooit vir skool opgedaag nie.

Zuan het bruin hare en oë en weeg in die rigting van 80-90 kilogram.

Sy ma, Chantal, het Vrydag ‘n vemiste persoon saak by die polisie oopgemaak.

Haar vriendin, Tineke Heeringe, vertel dat hulle bekommerd is oor Zuan aangesien hy al vir meer as twee dae skoonveld is.

“Toe die skool vir Chantal laat weet dat Zuan nie daar was nie, het sy dadelik polisie toe gegaan. Sy bekommer haarself dood en sukkel om te eet of drink,” vertel Tineke.

Zuan het ook verskeie mediese kondisies waarvoor hy medikasie benodig en kan nie lank sonder sy medikasie gaan nie.

Kontak SAPD Potchefstroom by 018 299 7476/7 vir enige inligting rondom Zuan se verdwyning.