Chaotiese partytjie by ou treinstasie
'n Chaotiese partytjie by die ou treinstasie het groot bekommernis veroorsaak onder inwoners en veiligheidspersoneel.
Op 30 November 2024 het ‘n gruwelike en chaotiese partytjie by die ou treinstasie in Potchefstroom plaasgevind, wat groot bekommernis veroorsaak het onder die plaaslike inwoners en veiligheidspersoneel. Verskeie ooggetuies en inwoners het met die Herald gesels oor die insident, wat volgens hulle nie net gevaarlik was nie, maar ook die gebrek aan beheer en toesig in die omgewing blootlê.
DA raadslid, Madra De Bruin het die volgende uitgespreek: “Die toegang vanaf die N12 na die stasie en ander gebiede rondom die stasie het die deur oopgemaak vir ongewenste elemente, wat insluit mense wat nie tot die gemeenskap behoort nie.”
Jackson Kiewiets, ‘n inwoner wat naby die ou treinstasie woon, het die situasie as “chaoties en onveilig” beskryf. “Ek het al lankal gesukkel met die rumoer en die onwettige partytjies wat daar plaasvind,” het Kiewiets gesê. “Op die aand van die 30ste was dit selfs erger. Die mense het in groot groepe rondom die stasie gesamentlik, drank en ander dinge gebruik, en die chaos het vinnig die hele buurt ingeneem.”
Volgens Kiewiets het die partytjiegangers ‘n tydelike hek gebreek en mense wat nie aan die partytjie deelgeneem het nie, is aangeval en beroof “Ek het mense gesien wat in die rigting van die treinstasie hardloop, en ek was bekommerd oor die veiligheid van kinders in die nabygeleë sub-ekonomiese behuising,” het hy bygevoeg.
Alton Bungi, een van die sekuriteitswagte wat op daardie aand op die terrein was, het bevestig dat die situasie buite beheer geraak het. “Ons het nie genoeg mense om die situasie te hanteer nie. Die groep mense was te groot, en die gevaarlikste deel was dat mense vry toegang gehad het vanaf die N12 na die stasie,” het Bungi verduidelik. “Ons was nie voorbereid op die volume nie. Ek het persoonlik gesukkel om die situasie te beheer en mense van die terrein af te verwyder.”
Die situasie het die inwoners van die area verontrus, wat steeds bekommerd is oor die gebrek aan veiligheid in die omgewing. “Daar is geen beheer oor wat gebeur nie, en as iets nie vinnig gedoen word nie, sal die geweld toeneem,” het Kiewiets bygevoeg.
