‘n Man het sy been in Petersonstraat gebreek nadat hy van die toneel van ‘n moontlike inbraak probeer vlug het.

Volgens Christiaan Haefele, bedryfsbestuurder van Mooirivier Beskerming, het reaksiebeamptes Sondagaand by ‘n naby geleë perseel ‘n alarm ontvang, waarna hulle by die perseel afgestaan het.

“Daar was eintlik by ‘n ander perseel ‘n inbraak gewees. Daar was ‘n glasdeur wat stukkend was. Die kliënt het nie besef dat daar nog verdagtes binne in die perseel is nie waarna hy die traliehek gesluit het,” het Haefele gesê.

Maandagoggend het die wag wat by die perseel geplaas is, die twee verdagtes gesien. Die een verdagte het deur die venster geklim en weg gekom. Die ander man het oor ‘n muur gespring waarna hy geval het en sy been gebreek het.

Volgens Haefele is die polisie ontbied, waarna die verdagte onder die wakende oog van polisie lede na die hospitaal geneem is vir behandeling.