Onderwysers en altesaam 1980 kinders moet glo elke dag in haglike omstandighede by Laerskool Promosa skoolgaan. Dit weens geen water en gebreekte toilette.

In ‘n video kan gesien word hoe toilette oorloop.

Onderwysers en kinders weier tans om by hulle klasse in te beweeg en is in opstand op die skool perseel.

Volgens verskeie bronne, wat anoniem wil bly, het die probleem alreeds maande gelede begin toe ouers en gemeenskapslede nie die nuwe hoof wat deur die departement aangestel is, wou aanvaar nie.

“Die skool het nie tans ‘n hoof nie. Dit is hoekom niks reggemaak word nie. Al die badkamers behalwe twee, waarvan helfte van die toilette gebreek is, is weens die watertekort gesluit. Hoe moet 1980 kinders badkamer toe gaan,” het een bron gesê.

‘n Tweede bron sê die departement weier glo om die skool te sluit en verwag kinders en onderwysers moet elke dag skool bywoon.

Personeel het hulle frustrasie in ‘n verklaring uitgespreek.

“Ons as personeel van Promosa Laerskool wil graag formeel ons voortlopende en onopgeloste griewe uitspreek. Ons skool het +- 2000 leerders en meer as 60 personeellede. Dit is dus ‘n onmoontlike en uiters onhigiëniese situasie om nie water by die skool te hê nie. Ons het die afgelope paar weke met ‘n waterkrisis te doen gehad. Ons het dikwels 2 of 3 dae per week nie water nie. Ons het egter die moeilike omstandighede verstaan en het voortgegaan om by die skool op te daag en te onderrig, ten spyte van die uitdaging,” lui die verklaring.

“Dit is uiters moeilik om by die werk te wees en nie ‘n werkende badkamer te hê om onsself te verlig nie. As vroue is dit selfs moeiliker met betrekking tot ons maandelikse menstruasie. Die leerders urineer teen die mure en gooi stoelgang op die vloer en in die bosse rondom die skool. Grondslagfase-leerders bemors hulself as gevolg van geslote badkamers en geen water nie. Dit is ‘n situasie wat ons met uiterste en bewonderenswaardige geduld aangepak het. Ons het die leerders altyd eerste gestel en onder onrealistiese en chaotiese omstandighede onderrig gegee.”

Die verklaring gaan ook aan om ander kwessies aan te spreek.

“Behalwe vir die watersituasie, het ons as personeel in ‘n skool sonder ‘n permanent aangestelde SBS gefunksioneer. Ons het steeds nie ‘n permanente skoolhoof by die skool nie, en die DH-poste is ook nie gevul nie. Hierdie gebrek aan bestuur het ‘n drastiese en negatiewe impak op die dissipline en algehele funksionaliteit van ons skool gehad. Ons as personeel het stakings van die gemeenskap verduur, waar ons by talle geleenthede uit die skool gesluit is. Ons het teistering deur gewelddadige betogers verduur. Ons het ‘n onveilige werksomgewing verduur as gevolg van dreigemente en stakings. Nou moet ons ook die probleme van ‘n skool sonder water verduur – waar die basiese behoeftes van onderwysers en leerders nie ernstig opgeneem word nie.”

“Ons voel dat ‘n brief opgestel en huis toe gestuur moes gewees het aan ouers – waarin versoek word dat leerders tuis bly gedurende die duur van waterbeperkings, aangesien dit onmoontlik is om as mens te funksioneer sonder die basiese behoefte aan water.”

“Ons het ‘n spontane en onbeplande standpunt ingeneem op die oggend van 7 Augustus 2025. Ons het by die werk aangekom en eenvoudig gevoel dat ons bekommernisse nie gehoor word nie. Ons het besluit om voor die kantoor bymekaar te kom om ons bekommernisse uit te spreek.Ons weier nie om ons leerders te onderrig nie. Ons weier eenvoudig om langer geïgnoreer te word. Ons hoop dat u al hierdie ernstige klagtes in ag neem en ons in alle opsigte bystaan.”

Die Herald het die departement vir kommentaar gekontak, maar wag vir terugvoer.

Kyk na die video hier: