Twee mense is dood nadat ’n ligte vliegtuig Saterdagmiddag naby Fochville in Gauteng neergestort het.

Volgens die eerste inligting het die oproep oor die vliegtuigongeluk omstreeks 16:26 deurgekom.

Nooddienste, waaronder Gauteng EMS, ER24 en Netcare911, is onmiddellik na die toneel ontbied, terwyl lugmediese dienste van Netcare911 en Rocket HEMS op bystand geplaas is.

Met hul aankoms op die toneel het paramedici bevestig dat beide insittendes noodlottige beserings opgedoen het.

Die Krugersdorp-soek-en-reddingshonde was ook onderweg na die toneel om met die operasie by te staan.

Die toneel is daarna aan die Suid-Afrikaanse Polisiediens (SAPD) en die Suid-Afrikaanse Burgerlugvaartowerheid se Afdeling vir Ongeluk- en Voorvalondersoeke oorhandig, wat die omstandighede rondom die ongeluk sal ondersoek.

Verskeie nooddienste en reddingsorganisasies, waaronder SAPD Airwing, SAPD K9 Search and Rescue, SAPS Fochville, Gauteng EMS, ER24, Netcare911, Rocket HEMS, SARZA, S.C.A.T.S. en HAMNET, was by die reaksie op die voorval betrokke.

Die identiteit van die oorledenes is nog nie bekend gemaak nie en meer inligting sal bekend gemaak word sodra dit beskikbaar is.