’n 32-jarige vrou is na bewering deur ’n ander vrou aangeval en met ’n mes gesteek terwyl sy Donderdagmiddag, 5 November, op pad huis toe van die werk was.

Die voorval het in Bremnerstraat in Baillie Park plaasgevind.

Volgens inligting van die polisie is die slagoffer na bewering deur die verdagte agtervolg, waarna dié probeer het om haar handsak te gryp.

Die verdagte het die vrou glo aangerand, wat veroorsaak het dat sy op die grond geval het. Sy is daarna na bewering met ’n mes gesteek.

Die slagoffer kon daarin slaag om van haar aanvaller te ontsnap en na ’n nabygeleë huis te hardloop, waar sy hulp ontvang het.

Die Potchefstroom-polisie ondersoek ’n saak van aanranding met die opset om ernstig te beseer (GBH).

“Geen arrestasie is in hierdie stadium gemaak nie, en die ondersoek duur voort,” het sersant Kelebogile Morake, polisiewoordvoerder, gesê. Enigiemand met inligting wat die polisie met die ondersoek kan help, word versoek om na vore te kom.