Beide Gimmies se o.15A en eerste spanne het aan die verloorkant hierdie afgelope Saterdag (5 November) geëindig teen Pretoriaanse skole. Gimmies se o.15A verloor met 99 lopies (Duckworth/Lewis) teen Hoërskool Garsfontein, terwyl die eerste span met 5 paaltjies teen ‘n puik Waterkloof span vasval.
Al het albei spanne hulle als gegee was dit nie genoeg om die eindstryd te haal nie.
Eerste span: Potchefstroom Gimnasium teen Hoërskool Waterkloof
Gimmies kolf eerste en teken 197/7 in 50 boulbeurte aan in ‘n kolbeurt waar hulle sukkel teen Waterkloof se gedissiplineerde boulwerk.
Gimmies sukkel tot 15/2 na 12 boulbeurte met Ruan Lotz en Tommie Botha wat nie veel bydra met die kolf nie. Wian Herbst se onoorwonne 72 (118) en Righardt Joubert se sprankelende 43 (24) is enkele hoogtepunte.
Waterkloof se eie Wian, Wian Ruthven moker 93 (56) om sy span na ‘n gemaklike oorwinning met meer as 25 boulbeurte oor te neem.
Marcus Bakker (55 van 64 balle) en Christian du Toit (39 van 34 balle) dra ook by tot Klofies se oorwinning. Johan Mahne (2/26) en Marnu Cronjé (2/24) is Gimmies se beste boulers op die dag.
O.15A: Potchefstroom Gimnasium teen Hoërskool Garsfontein
Van die staanspoor af is Gimmies op die agtervoet teen ‘n gedugte Garsfontein-span toe die besoekers 314/9 op die Gimmie-Oval in hierdie Noordvaal halfeindstryd aanteken.
Jared Carr se 62 van 67 balle, Heinrich Badenhost se 74 van 81 balle en ‘n energieke 62 lopies van 29 balle danksy Eckard Struwig, gee vir Garsfontein hulle goeie platform.
Zandre da Silva (4/50) en Juandré Barends (3/57) lewer goeie vertoning te midde van lopies wat soos die Mooirivier vloei.
Divan van Eldik (33 van 56 balle) is Gimmies se hoogste lopiemaker in hulle telling van 130/6 in 36.2 boulbeurte.
