Hoërskool Riebeeckrand se seuns en dogters hokkiespanne het vanjaar puik gevaar en beoog om tydens hul volgende seisoen op dié sukses voort te bou.
Volgens Hoërskool Riebeeckrand se bemarker, Rikus Kruger, het beide hul A- en B-dogters hokkiespanne in die Puk Hokkiereeks deelgeneem.
Hulle moes teen ander skole soos Brits, Wonderboom en Swartkopz meeding en het hulself goed van hul taak gekwyt.
“Ons junior en senior seuns hokkiespanne moes ook teen dié skole kragte meet en het ook baie goed gevaar,” vertel Rikus.
Tydens die mediumskoleliga, het Riebeeckrand se eerstespan behoorlik uitgeblink en is na ‘n suksesvolle seisoen as liga-naaswenners gekroon.
Dié gedugte span moes kragte meet teen skole soos Carletonville, Fochville, Bekker en Jan Viljoen.
“Die eerstehokkiespan, o.16 en o.14 spanne was ook poelwenners tydens dié liga,” vertel Rikus.
Aangesien Riebeeckrand se eerstehokkiespan as naaswenners gekroon is, het hulle ook deurgedring na die Noord-Vaal toernooi wat van 8-10 Augustus plaasgevind het.
Tydens die toernooi het Riebeeckrand weer groot sukses geniet.
Die seuns hokkiespanne het self goed gevaar in die ligawedstryde.
Riebeeckrand se senior seunshokkiespan is ook as liga-naaswenners aangekondig.
Rikus vertel dat Riebeeckrand vanjaar twee dogters- en een seunshokkiespan vir die Prestige Noordheuwel Hokkietoernooi gaan inskryf.
