Talle kleuters van Ramkriekies Kleuterskool by Laerskool Randfontein het gedurende die afgelope Raca Kunstefees hul talente ten toon gestel en is baie trots op hul puik uitslae.
Volgens die skakelbeampte van Laerskool Randfontein, Dalena Botha, het Armand Martins, Jana Martins, Alexia Smyth en Nicola van der Wath puik tydens die kunstefees gevaar en is sodoende na die Gala-oggend, wat op 14 September plaasgevind het, genooi om daar op te tree.
“Die Graad R leerlinge het gewys dat hulle glad nie skaam is om voor mense op te tree nie.
“Armand en Jana het vir hulle Afrikaanse gedigte elkeen 90 persent ontvang.
“Alexia het 99 persent vir haar gedramatiseerde gedig verower en Nicola 96 persent vir haar ongedramatiseerde gedig.,” vertel Dalena.
“Ons is baie trots op elkeen van julle.
“Dit is mooi om te sien hoe ‘n kind al van kleins af met hul talente woeker.”
