Hoërskool Riebeeckrand het weer vanjaar behoorlik geskitter tydens die Raca Kunstefees wat deur Randfontein High School aangebied is.
Volgens die bemarker van Hoërskool Riebeeckrand, Rikus Kruger, het Rierand 15 items by die kunstefees ingeskryf.
“Elkeen van die items wat ons ingeskryf het, het puik resultate gekry. Ons grootste trots is natuurlik ons orkes wat as afdelingwenners aangewys is,” vertel Rikus.
Die orkes is sodoende ook uitgenooi om tydens die Raca Gala funksie op 14 September op te tree. Hulle het tydens dié geleentheid selfs ‘n spesiale toekenning, vir beste orkes, ontvang.
“Die orkes het tydens die kunstefees met ‘n diamant toekenning weggestap en behoorlik stof in hul opponente se oë geskop,” vertel Rikus trots.
Verder het Riebeeckrand se koor ook met ‘n diamant toekenning weggestap.
“Beide ons Graad 10 en Graad 11 groepredenaarsgroepe het diamant toekennings verower, terwyl ons spreekkoor ‘n goue toekenning ontvang het,” vertel Rikus.
Hy vertel verder dat hul Graad 8 publieke toespraak item met ‘n diamant toekenning spog.
Hoërskool Riebeeckrand se Graad publieke toespraak item spog met drie toekennings, waarvan een ‘n diamant toekenning en twee platinum toekennings is.
“Ons pom-pom groep het ook baie goed gevaar en hulself van ‘n platinum toekenning verseker, terwyl ons junior dramagroep met ‘n diament toekenning weggestap het. Ons senior dramagroep het ‘n platinum toekenning ingepalm,” vertel Rikus.
Rierand se musiekblyspel het in drie verskillende kategorië deelgeneem.
Die junior musiekblyspel het ‘n goue toekenning ontvang, terwyl beide die senior en elite groepe met ‘n platinum toekenning spog.
“Ons almal by Hoërskool Riebeeckrand is werklik trots op ons kultuur leerlinge en wens elkeen van hulle geluk met hul puik prestasies tydens die Raca Kunstefees,” vertel Rikus.
