Die seisoenwisseling is met groot vreugde en blydskap deur Laerskool Randfontein ontvang.
Om die lente op Woensdag, 1 September te verwelkom het personeel ‘n beroep gekies wat hulle (kastig) eendag wil volg en daarvolgens aangetrek terwyl leerders soos blomme gelyk het.
Skoolwoordvoerder Annie Nolan het gesê dat die dag deur onderwysers Melani Bosman en Adelle Grobbelaar gereël is. Leerders kon ook helderkleurige oliebolle koop en die dag voluit geniet.
“Na al die Covid-19 inperkings en ongelukkigheid van die laaste paar maande het almal by die skool dit so nodig gehad om te lag. Die personeel het gesorg vir baie grappies en het so snaaks as moontlik aangetrek.”
Sy het gesê dat daar ‘n veearts was met haar twee hondepasiënte, Prinses Fiona en Sir Shrek. Die Mafia het die skoonheidskoningin en die gholfspelers geteiken, terwyl die polisievrou op die Mafia se spoor was.
“Dit was ‘n baie lekker dag. Al die Rammies is baie opgewonde oor die nuwe seisoen en ons wens vir almal ‘n vrolike lente toe.”
