Kleuters van Rosemarie Kahn Kleuterskool het op Vrydag, 3 September aan hul eie mini Olimpiese Spele deelgeneem.
“By Rosemarie Kahn glo ons kennis is mag, daarom hou ons daarvan om aktuele en relevante onderwerpe deel van ons kurrikulum te maak,” het kleuterskoolhoof Annézel Meiring gesê.
Sy het bygevoeg dat hulle die kleuters op ‘n prettige wyse oor die Olimpiese Spele wou leer.
“Daar was eers ‘n optog om die gronde met die skool se vlag en die kleuters se selfgemaakte vaandels, en daarna het hulle met baie entoesiasme weggespring om deel te neem aan verskeie items soos hekkies, verspring, hoogspring, langafstande en gewigstoot.
“Daar was ook ‘n hindernisbaan, en die kleuters kon ook sokker speel, doele gooi, balanseer op ‘n balk, en sagte balveerpyltjies gooi. Dit was inderdaad ‘n leersame en prettige ervaring vir groot en klein.”
