Gemeenskap wens bejaarde geluk met 100e verjaarsdag

Sarie van der Merwe het op 28 Januarie haar 100e verjaarsdag gevier.

Sarie het vertel sy is naby Zeerust gebore. Sy is op die ouderdom van 16 uit die skool uit waarna sy Braamfontein toe getrek het. Daar het sy in die teekamer by Johannesburg stasie gewerk. In 1944 het sy haar eerste man ontmoet en is hulle getroud. Saam het hulle vier seuns uit die huwelik.

“Ek is baie dankbaar teenoor die Here dat ek vandag nog hier sit,” het Sarie gesê.

In 2022, het sy Randfontein toe gekom en steeds dolgelukkig.

Sy het vertel iets wat haar vir altyd sal bybly is die Europese toer wat sy saam met haar tweede man meegemaak het. Sy onthou nog goed hoe hulle daardie jaar die nuus gekry het dat Suid-Afrika hul eerste Wêreldbeker gewen het. Hulle het op die Eiffel Toring gestaan en sy onthou die groot jolyt van al die mense.

Tannie Sarie het ook ‘n liefde vir brei en het juis genoem hoe sy gereeld seekatte brei wat dan vir babas (wat te vroeg gebore is) gevat word. Sy het verduidelik die bene van die seekat help hulle vingers met ontwikkeling. Om blokkiesraaisels in te vul en woordsoeke te voltooi is haar ander stokperdjies.

Vir die jonger generasie wou sy graag ‘n boodskap van hoop oordra.

“Die toekoms is in die Here se hande. Bid altyd dat Sy wil geskied.”

Op 26 Januarie is daar vir Sarie ‘n onthaal by AGS Randgate gehou ter viering van haar mylpaal-verjaarsdag.