Die 20-jarige Kyle Louw van Toekomsrus is al meer as ‘n jaar lank lid van die Randgate Boksklub en wys geen teken dat hy binnekort gaan ophou nie.

Met toewyding en harde werk het hy reeds oorwinnings behaal en waardevolle ervaring in die ring opgedoen.

Kyle vertel dat sy liefde vir die sport begin het toe hy as kind boks op televisie gekyk het. Nadat hy bokskampioene soos Floyd Maywea-ther gesien het, het hy besluit om self die handskoene aan te trek.

“Ek geniet dit die meeste om op die sakke te oefen, want dit versterk my arms, skouers en bene,” sê hy.

Hy het al aan twee kompetisies deelgeneem – een gewen en een verloor. Hy het die afgelope naweek ook aan ‘n toernooi deelgeneem, maar die uitslae was nie teen

druktyd beskikbaar nie.

Kyle oefen twee keer per dag, by die klub én by die huis, en gebruik naweke om te rus en te herstel. “Ek is baie gelukkig by die klub,” sê hy.

“My familie is ook baie trots op my vordering tot dusver.”