Ram Goudfees bring 12 skole saam in sportfees
Jong rugby- en netbalspelers van 12 skole het op Laerskool Randfontein se Ram Goudfees die veld ingevaar, terwyl families saamgetrek het vir ’n dag van sport, gemeenskapsgees en feestelike stalletjies.
Laerskool Randfontein het Saterdag gegons van energie en trots toe die gewilde Ram Goudfees jong atlete van 12 skole vir ’n dag van sport en gemeenskapsgees byeengebring het.
Die deelnemende laerskole, insluitend die gasheer Laerskool Randfontein, was Rapportryer, Westgold Primary School, Gerrit Maritz, Dagbreek, Fochville, Bekker, Dr Havinga, Krugersdorp-Noord, Losberg, Horison en Hasie Kalbassie.
LEES OOK: Groot derby, groot trots
Die fees het netbal- en rugbywedstryde vir o6-, o7-, o8- en o9-spanne ingesluit en jong deelnemers die geleentheid gebied om hul talent op die veld te wys. Ten spyte van hul ouderdom het die spelers indrukwekkende entoesiasme, spanwerk en vasberadenheid deur die loop van die wedstryde getoon.
Die geleentheid het nie net oor sport gegaan nie, maar het ook as ’n lewendige sosiale byeenkoms gedien. Honderde ouers, grootouers en familielede het opgedaag om die kinders te ondersteun, wat ’n feestelike atmosfeer op die skoolterrein geskep het.
Modibedi Mokale, wie se seun Boikago Mokale Rammies bywoon, het gesê dit was wonderlik om net te ontspan en ’n gesinsdag by die skool te geniet.
“Die kinders geniet die tyd van hul lewe om sport te speel en kos by die stalletjies te koop, so dit is ’n wonderlike manier om die dag deur te bring,” het hy gesê.
Daar was ook talle stalletjies met ’n verskeidenheid kos, drankies en produkte, wat verseker het dat daar iets vir almal was om te geniet. Gesinne het die dag benut om die vrolike atmosfeer in te neem terwyl hulle die jong atlete ondersteun het.
Annelien Bezuidenhout, een van die organiseerders, het gesê die dag was ’n groot sukses en dat ouers en leerders dit baie geniet het.
“Die doel van die dag was om leerders van verskillende skole bymekaar te bring vir ’n dag van pret en kameraadskap — nie net vir die kleingoed nie, maar ook vir die ouers,” het sy gesê.
Sy het bygevoeg dat die dag nie moontlik sou wees sonder Bianca Jansen van Vuuren, die mede-organiseerder van die geleentheid, die deelnemende skole, asook die onderwysers en personeel van Rammies wat gehelp het om die dag moontlik te maak nie.
Die Ram Goudfees was ’n groot sukses en het gemeenskapsbande versterk terwyl dit die gees van jeugsport in Randfontein gevier het.
