Drie boewe het Woensdag (1 Oktober) hul wegkomvoertuig in die oprit van ‘n huis in Picassostraat, Moreletapark gelos toe die huishulp ‘n paniekknoppie gedruk en die mans vermoedelik die skrik op die lyf gejaag het.
JP Griesel, bestuurder van Bull Security, het gesê die mans het omstreeks 12:00 die elektriese motorhek oopgedwing en toegang tot die huis gekry.
Dit is onseker of die mans gewapen was.
“Die mans het die huishulp gekonfronteer en sy het die paniekknoppie gedruk,” het Griessel gesê.
Hulle het hul vermoedelik uit die voete gemaak toe die loeiende sirene hulle verras het. Die swart Ford Fiesta waarin hulle gery het, is by die toneel gelos.
Polisiewoordvoerder Adjudant-offisier Dave Miller het gesê die voertuig is vermoedelik ‘n gesteelde een. “Niemand is beseer nie en niks is gesteel nie.”
Garsfontein-polisie ondersoek die saak.
Vir meer nuus, besoek Rekord op Facebook of volg ons op Twitter.
