‘n Aantal mangate in Kilnerpark is reeds sowat ses maande oop en sonder deksels. Inwoners is bekommerd dat dit veiligheidsrisiko’s vir kinders en diere inhou.
Meer as ‘n maand nadat Rekord oor drie oop mangate in Magdalena Willersstraat berig het, is twee van hulle steeds sonder deksels en die gate is sowat twee meter diep.
Francois van der Heyden, opsigter van die Kilner Gardens-woonstelblok in die gebied, is raadop. “Ek weet nie meer nie, dit is nie vir my reg om hierdie mangate net so te los nie. Wat gebeur as iemand daar inval?”
Rekord het vroeër berig dat Van der Heyden meen die ysterdeksels word vir skroot gesteel, omdat twee ander mangate in die straat met sement deksels ongestoord is.
Johan Mostert, een van die woonstelblok se trustees, sê Tshwane metro behoort skrootwerwe te besoek om te sien wat alles daar rondlê. “Om die mense te vang wat hierdie deksels vir skroot steel, is om net die simptoom van die probleem te behandel. Hulle moet na die bron van die probleem gaan – die skrootwerwe.”
Tshwane metro was nie onmiddellik vir kommentaar beskikbaar nie.
Vir gratis gemeenskapsnuus, besoek Rekord se webwerwe:
Besoek ook ons Facebook en Twitter blaaie.
