’n Hond is deur barmhartige Samaritane gered nadat die dier met draad vasgebind is in ’n parkie noord van Pretoria.
Pretoria-Noord-inwoner Rachel Raats sê die hond is vroeër dié week in Jopie Fouriestraat, Wolmer aangetref.
“Die hondjie se voete was met draad vasgemaak sodat sy nie kon loop nie,” sê Raats.
“’n Stuk van dieselfde draad is om haar nek gebind.
”Raats wat minderbevoorregte mense en haweloses een keer ’n week by haar huis onthaal en kos gee, sê sy is geskok oor die toestand waarin die hond gevind is.
“Sy was so verwaarloos en verwilderd. Sy wou byt van angstigheid en was verskriklik bang vir mense.”
LEES OOK: Animal cruelty unacceptable
Raats sê: “Een van die mense wat by my kom eet het, het vertel dat hy die hondjie in die park gesien lê het.
“Van my helpers het toe uitgegaan om te gaan kyk en het die diertjie gehelp losmaak.”
Raats sê dit lyk of die hond se eienaars haar mishandel het.
“Sy is vasgemaak en vir dood gelos,” sê sy.
Raats bedank die mense wat gehelp het om die hond te bevry.
Die hond is nou in die sorg van die Wollies-diereprojek in Hesteapark.
Stigter van Wollies, Cilla Trexler, sê daar word weekliks gevalle van dieremishandeling aangemeld.
“Hierdie wreedheid moet gestaak word. Daar is mense en organisasies wat kan help wanneer mense nie meer vir hul diere kan sorg nie.”
Trexler vra dat inwoners mense moet aanmeld wat hulself skuldig maak aan dieremishandeling.
Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 083 625 4114.
Vir jou daaglikse gratis gemeenskapsnuus, besoek Rekord se webwerwe:
Besoek ook ons Facebook, Twitter en Instagram blaaie.
