Pretoria-eiendomsontwikkelaars verbind om invloed van konstruksie-mafia uit te roei

’n Pretoria-oos gebaseerde eiendomsontwikkelingsmaatskappy, Atterbury Property, die Kaapstad metro, Old Mutual Properties en ander rolspelers het ’n reeks vergaderings gehou om die betrokkenheid van beweerde konstruksie-mafia besighede by eiendomsontwikkelingsprojekte aan te spreek.

Louis van der Watt, hoof uitvoerende beampte van die Atterbury-groep, het aan Rekord gesê daar sal altyd gemeenskapsbetrokkenheid en uitdagings in ontwikkeling wees, nie net in Kaapstad nie maar regoor die land.

“Ons is hoopvol dat die betekenisvolle verbintenis wat ons met die Stad Kaapstad gehad het, sal deursyfer na alle ander munisipaliteite, insluitend Tshwane. Ons benadering is om voortdurend ons prosesse te versterk en met relevante owerhede saam te werk om enige sulke kwessies doeltreffend aan te spreek,” sê Van der Watt.

Hy het met die rolspelers vergader nadat dit aan die lig gekom het Atterbury se naam verbind kan word met gemeenskapsgebaseerde groepe en subkontrakteurs met verbintenisse met Kaapstad se sogenaamde konstruksie-mafia.

Dit was tydens die groep se gesamentlike ontwikkeling van die King Air Nywerheidspark van R3-miljard naby Kaapstad Internasionale Lughawe sedert 2020.

Van der Watt het die kompleksiteite in die opsporing van onwettigheid in sakebedrywighede in die eiendomsontwikkelingsbedryf ná die vergadering uitgelig, veral wanneer sulke sake-eenhede onder ’n dekmantel funksioneer.

Hy verduidelik dat hierdie besighede dikwels oor al die nodige wetlike dokumentasie beskik.

Volgens hom maak hierdie faktor dit ’n uitdaging om hul ware aard deur middel van standaard keuringsprosesse te identifiseer.

Van der Watt het die behoefte aan samewerking met nasionale en plaaslike regering, insluitend die Suid-Afrikaanse Polisiediens en die Suid-Afrikaanse Inkomstediens, beklemtoon om sulke entiteite te help identifiseer.

“Die konstruksiemafia in Kaapstad werk gereeld deur wettig geregistreerde entiteite met geldige bankrekeninge en belastingklaringsertifikate. Finansiële state, maatskappyregistrasiedokumente, direkteurskapinligting en ander besigheidsertifisering is in orde, wat dit uiters moeilik maak om enige verbande met kriminele aktiwiteite deur standaardprosedures op te spoor,” sê Van der Watt.

Hy voeg by dat die eiendomsektor sterk staatmaak op die Nasionale Tesourie om ’n opgedateerde lys van swartlys-entiteite in stand te hou en beskikbaar te stel. Dit is aangesien die private sektor nie die hulpbronne en kapasiteit het wat plaaslike en nasionale regerings het om entiteite wat nie voldoen nie, te identifiseer.

Volgens hom versterk die groep nou hul keuringsprosesse vir subkontrakteurs verder om te verseker dat hulle op ’n deurlopende basis by etiese sakepraktyke hou.

“Ons is daartoe verbind om ons keuringsprosesse vir subkontrakteurs te verbeter om deurlopende nakoming van etiese sakepraktyke te verseker. Meer gereelde kontroles sal uitgevoer word om enige veranderinge in direkteurskap, eienaarskap, besigheidsaktiwiteite en finansiële status te monitor,” sê Van der Watt.

Hy verduidelik die keuringsproses behels ’n omvattende reeks nagaankontroles en word nou deurlopend bygewerk.

“Weens ons streng kontrole en teenwigte is geen ondersteuning verleen aan enige organisasies wat nie aan ons vereistes voldoen het om organisasies sonder ’n winsoogmerk by te staan nie,” benadruk Van der Watt.

Lyndon Khan, woordvoerder van die burgemeesterskantoor in Kaapstad, sê die samewerkende gesprekke het gelei tot ’n samehorigheid deur rolspelers om enige toekomstige verbintenis met beweerde kriminele ondernemings in ontwikkelings- en konstruksieprojekte te voorkom.

LEES: Over 200 pairs of school shoes collected for north learners

Het jy dalk meer inligting rakende dié storie? 

Stuur gerus vir ons ‘n epos na  bennittb@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram blaaie.