Metro sê nee vir Moot-beurtkrag-vrye substasie
'n Versoek om Koedoespoort-substasie van beurtkrag vry te stel om soortgelyke probleme in die winter met kragvoorsiening soos die afgelope weke te voorkom, is van die hand gewys.
Die Tshwane-metro het ’n versoek van DA-raadslid Anru Meyer van die Moot om die Koedoespoort-substasie van beurtkrag-vry te stel, van die hand gewys.
Hierdie versoek kom te midde van aanhoudende kragvoorsieningsprobleme in die Moot-gebied.
Meyer het in ’n e-pos aan die metro beklemtoon dat 33 kabelfoute die afgelope twee weke in Queenswood en die Moot voorgekom het, onder meer weens kragonderbrekings en krag wat uitskop by die Koedoespoort-substasie.
“Dit lyk vir ons of die af- en aanskakeling van krag met beurtkrag die netwerk destabiliseer. Ons is veral bekommerd oor substasies wat Koedoespoort se nywerheidsgebied voed en nie voldoende beskerming geniet nie. Daar is ’n risiko dat sulke substasies soos Blesbok onherstelbare skade kan ly,” waarsku Meyer.
Volgens Meyer het die Koedoespoort-substasie in die afgelope paar weke gereeld uitgeskop ná beurtkrag, wat skade aan drie kragkabels in die Môregloed-omgewing veroorsaak het.
Twee van hierdie kabels is hooftoevoerkabels. Hy het ook daarop gewys dat Koedoespoort-substasie verlede jaar onder ’n brand deurgeloop het en dat daar onlangs verdere probleme met die transformator was.
Meyer het sy versoek gebaseer op ’n bestaande proses wat volgens ’n ander raadslid vroeër klaarblyklik gevolg is om die Wapadrand- en Mooikloof-substasies beurtkrag-vry te verklaar.
Volgens ’n vorige besluit deur voormalige Tshwane-burgemeester Randall Williams in 2021, is sekere Pretoria-oos-substasies van beurtkrag uitgesluit na verwoestende brande.
Die metro het egter nie Meyer se versoek om ’n aansoekvorm vir uitsluiting van beurtkrag te ontvang, toegestaan nie.
Volgens Lomile Modiselle, ’n metro-verteenwoordiger en direkteur van Tegniese Dienste: Netwerkbeheer en Kragstelselbeskerming, is beurtkrag nie die primêre oorsaak van die kragprobleme by Koedoespoort nie.
“Daar is ander tegniese uitdagings wat die substasie se betroubaarheid raak. Hierdie kwessies moet deur ons tegniese span aangespreek word,” het Modiselle in ’n e-pos aan Meyer verduidelik.
Daar is voorts bevestig dat die netwerk in die Moot vir toekomstige stabiliseringsprojekte geoormerk is.
Die aanname dat Wapadrand-substasie deur ’n formele aansoek vrygestel is, is deur Modiselle weerspreek en daar is beklemtoon dat die vrystelling ’n tegniese besluit was weens veiligheidsrisiko’s vir operateurs tydens beurtkrag.
DA-raadslid Adriana Randall het haar kommer uitgespreek oor die voortdurende laste op die Moot se kabelnetwerk en die moontlike impak op inwoners en besighede in die komende wintermaande.
“Die metro se weiering is sonder ’n behoorlike ondersoek geneem. Ek is bekommerd dat verdere beurtkrag die reeds brose netwerk sal benadeel en herstelwerk verder kan vertraag,” het sy opgemerk.
Volgens die metro se beleid moet enige instansie wat beurtkragvrystelling versoek, bewys lewer van alternatiewe energiebronne en finansiering vir netwerkstabilisering.
Besluite oor vrystellings word geneem op grond van omvattende tegniese assesserings en regulatoriese vereistes.
Modiselle het beklemtoon dat die metro steeds verbind is tot langtermynoplossings vir die Moot se kragprobleme, maar dat Koedoespoort-substasie tans nie vir beurtkragvrystelling kwalifiseer nie.
LEES: Tshwane claims 80 fleet controllers are managing the metro fleet amid dispute over vehicle tracking
Het jy dalk meer inligting rakende dié storie?
Stuur gerus vir ons ‘n epos na bennittb@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram en TikTok.
