Inloopsentrums nog onbekend met registrasie om die draai
Met aanlyn skoolaansoeke wat op 24 Julie open, wag honderde Gautengse ouers steeds op ’n lys van instapsentrums wat hulle moet help. Sonder dié inligting groei die vrees vir nóg ’n registrasie-ramp soos vroeër vanjaar.
Die Gautengse Departement van Onderwys (GDO) moet nog die lys van 81 gedesentraliseerde instapsentrums bekend maak om ouers sonder internetverbinding te help om die kinders vir skooltoelating te registreer.
Daar is nog net ’n paar dae oor voor die opening van die aanlyn toelatingsaansoeke vir graad 1 en 8 in 2026 op 24 Julie.
Hierdie gebrek aan deursigtigheid skep onnodige angs vir ouers wat hierdie inligting nodig het om vooraf voor te berei.
Die DA het sy beroep op die departement herhaal om dringend die volledige lys van sentrums, insluitend bedryfstye, te publiseer en te verseker dat hierdie fasiliteite van die begin van die aansoekproses af in werking is.
“Ouers moet van die begin af sekerheid en toegang tot hulp hê, nie nadat die stelsel weens druk ineengestort het nie,” sê Sergio Isa Dos Santos, DA-lid van die provinsiale wetgewer.
Verlede jaar se aansoekproses is gekenmerk deur stelselfoute en verwarring, wat gelei het tot vertragings vir ouers wat plasings vir hul kinders wou bekom.
Gevolglik het die DA Gauteng vroeër vanjaar ’n beroep op die department gedoen om die proses reeds in Mei te begin om die siklus van chaos te verbreek.
“Die departement het nie op ons vorige waarskuwings ag geslaan nie, aangesien dit weereens versuim het om noodsaaklike logistieke inligting betyds te verskaf,” verduidelik Dos Santos.
Hy verduidelik dat die DA in Gauteng amptelike vrae aan die departement gerig het waarin die volledige lys van gedesentraliseerde inloopsentrums en hul presiese liggings versoek word.
“Tot op hede het ons geen reaksie van LUR Matome Chiloane ontvang nie. Dit weerspieël ’n ontstellende onverskilligheid teenoor ons kinders se opvoedkundige vooruitsigte en die geheimsinnige manier waarop die regering onder leiding van Premier Panyaza Lesufi funksioneer,” glo Dos Santos.
Hy moedig ouers aan om enige probleme wat hulle met die stelsel of by inloopsentrums ondervind, aan te meld.
“Ons sal hierdie kwessies noukeurig monitor en ’n omvattende profiel saamstel om die departement aanspreeklik te hou.
Hy voeg by dat vanjaar se situasie tussen 15 en 30 Januarie nie herhaal moet word nie. Meer as 6 377 leerders moes nog geplaas word.
“Hierdie vertraging het veroorsaak dat duisende leerders weke se leer misgeloop het weens die departement se ondoeltreffendheid. Gister het die LUR aangekondig dat die laat aansoekproses eers in Januarie sal oopmaak, wat die werklike risiko van ’n herhaling, of erger, scenario as verlede jaar verhoog,” meen Dos Santos.
Die Solidariteit Skoleondersteuningsentrum (SOS) het ook ouers aangemoedig om so spoedig moontlik registrasies op die korrekte manier met die nodige ondersteunende dokumente voor te lê.
“Ouers van voornemende graad 1- en graad 8-leerders in Gauteng moet so gou moontlik registreer wanneer die registrasieproses vir 2026 op Donderdag, 24 Julie om 08:00 open,” sê Leon Fourie, uitvoerende hoof van SOS.
Hy het daarop gewys dat die 2026-aansoektydperk ouers net meer as ’n maand gee om hul aanlyn registrasie af te handel en plasings begin op 16 Oktober.
Hoewel verskeie plasingskriteria, soos huisadres en taal van onderrig, in ag geneem word, geld die regsbeginsel van eerste in plek, eerste in reg steeds.
“Dit beteken dat ouers wat vroeg en volledig aansoek doen, ’n beduidend beter kans het op plasing by hul voorkeurskool,” sê Fourie.
Belangrike riglyne vir ouers:
– Graad 1- en 8-aansoeke vir Gautengse openbare skole vir 2026 kan slegs aanlyn via www.gdeadmissions.gov.za geskied. Bewaar die waglysnommer wat per SMS gestuur word veilig.
– Die SOS beveel aan dat ouers slegs een, hoogstens twee skole, van voorkeur kies, al moedig die stelsel hulle aan om tussen drie en vyf skole te kies. Dit help dat skole hul werklike aanvraag en kapasiteit realisties kan bepaal.
– Alle gesertifiseerde dokumente moet binne sewe dae ná die aansoek eerder fisies by die skool van eerste keuse ingedien word. Die bewys wat deur die skool uitgereik word, moet veilig bewaar word.
– Deur aansoeke te beperk en dokumente fisies by die voorkeurskool in te dien, help ouers skole om aansoeke te bestuur.
– Bewys van huisadres is die belangrikste dokument vir plasing – sorg dat dit ooreenstem met wat jy op die stelsel invoer.
– Neem skermskote van elke stap in die aanlyn proses en bewaar dit veilig vir ingeval daar later navrae of ’n dispuut oor die aansoek of plasing ontstaan.
– Gebruik een betroubare selfoonnommer tydens registrasie – alle kommunikasie geskied via SMS.
– Leerders kan slegs aansoek doen by hoërskole wat dieselfde tale aanbied as dié wat op hul graad 7-rapport aangedui word. Dit beteken dat graad 8’s slegs geplaas sal word by skole waar die taal van onderrig, huistaal en addisionele taal ooreenstem met die wat in die laerskool geneem is.
Maak seker jy het dié nodige dokumentasie byderhand:
– Bewys van huisadres (bv. munisipale rekening, nie ouer as drie maande nie).
– Gesertifiseerde ID van ouer/voog (of toepaslike immigrasiedokumente).
– Mees onlangse graad 7-skoolrapport (graad 8-aansoekers).
– Gesertifiseerde geboortesertifikaat van die leerder.
– Gesertifiseerde kliniekkaart of immunisasieverslag (graad 1-aansoekers).
“Ouers moet nie skroom om by hul voorkeurskool aan te klop vir hulp rakende die registrasieproses nie. Toegewysde administrateurs is by skole aangestel om ouers en voogde by te staan en kan selfs namens ouers en voogde die aanlyn registrasieproses hanteer mits hulle die voornemende leerder se volledige pakkie met al die dokumentasie het,” voeg Carien Bloem, AfriForum se hoof van Onderwysprojekte, by.
“Die Solidariteit Beweging se instellings staan graag skole by in hierdie verband. Ons kan nie die belangrikheid van vroeë en volledige aansoeke genoeg beklemtoon nie,” sluit Fourie af.
“Dit is van kardinale belang dat ouers die volledige aanlyn proses betyds voltooi en alle dokumente fisies by hul gekose skole indien.”
Het jy dalk meer inligting rakende dié storie?
Stuur gerus vir ons ‘n epos na bennittb@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram en TikTok.
