Oud of jonk: Vrywilligers wil diensbaar wees
Tydens die Internasionale Jaar van Vrywilligers, word die stories van JD Müller en Vena Strauss uitgelig. Van jong leierskap tot lewenslange diens wys hulle hoe volhoubare, vaardigheidsgebaseerde vrywilligerswerk werklik gemeenskappe versterk en hoop bring waar dit die nodigste is.
Vrywilligers is die ruggraat van baie gemeenskappe, en tydens Vrywilligersmaand van Solidariteit Helpende Hand, val die fokus doelbewus op die mense wat hul tyd en energie gee om ander te help.
Vanjaar kry dié erkenning ekstra gewig, aangesien die Verenigde Nasies 2026 as die Internasionale Jaar van Vrywilligers vir Volhoubare Ontwikkeling verklaar het.
Die klem val op volhoubare, vaardigheidsgebaseerde betrokkenheid eerder as korttermyn-ingrypings.
Volgens Liani Louw, streekorganiseerder van Helpende Hand se Groter Centurion-streek, is dit presies waar plaaslike vrywilligers ’n verskil maak.
“Dit gaan nie net oor een dag se hulp nie, maar oor mense wat aanhou opdaag en bou,” sê sy. “Hulle bring energie, maar ook ’n ingesteldheid om werklik betrokke te raak.”
Een van dié vrywilligers is JD Müller (24) van Centurion.
Hy dien as takvoorsitter van die Klopdisselboom-tak en het reeds tydens sy studentejare begin betrokke raak.
“Toe ek die impak van Helpende Hand eerstehands beleef het, het dit my net verder ingetrek,” sê hy.
Aanvanklik was hy onseker. “Ek het nie geweet of wat ek doen werklik saak maak nie,” sê hy. “Maar toe ek sien hoe mense reageer, het dit alles verander.”
Hy glo diensbaarheid begin by ’n eenvoudige keuse.
“Dit gaan oor jou bereidwilligheid om op te daag,” sê hy. “Jy hoef nie alles te weet nie, jy moet net begin.”
Müller werk nou saam met ander vrywilligers en help om projekte te dryf. “Soms is dit die klein goed wat die grootste verskil maak,” sê hy. “Jy besef vinnig jy hoef nie iets groot te doen om iemand se dag te verander nie.”
Een van sy gunstelingprojekte is die vakansieprogramme vir kinders.
“Om daardie vreugde in kinders se oë te sien, hou my aan die gang,” sê hy. “Dit herinner my hoekom ek dit doen.”
Hy plaas groot klem op samewerking. “Daardie samewerking maak die impak soveel groter,” sê hy. “Wanneer mense saamstaan, gebeur dinge.”
Vir hom is vrywilligerswerk ook persoonlik vormend. “Dit het my meer empaties gemaak,” sê hy. “Ek kyk anders na mense en hul omstandighede.”
Hy sê dit het hom ook as leier laat groei. “Ek moes leer om verantwoordelikheid te neem,” sê hy. “En om ander te motiveer.”
Aan die ander kant van die spektrum is Vena Strauss (70), wie se jare lange betrokkenheid ’n voorbeeld is van volhoubare diensbaarheid, presies die tipe betrokkenheid wat die Internasionale Jaar van Vrywilligers wil beklemtoon.
Strauss, van Wierdapark, het haar loopbaan by Helpende Hand by ontvangs begin.
“Aanvanklik was dit vir my ’n groot uitdaging,” sê sy. “Ek het gedink ek gaan net sit en oproepe antwoord.”
Haar ingesteldheid het egter vinnig verander. “Ek moes besluit dat diensbaarheid doelgerig uitgeleef kan word,” sê sy. “Ongeag jou pos.”
Sy voeg by: “Dit waarvoor ek verantwoordelikheid gekry het, het beter as my beste verdien.”
Haar rol het uitgebrei na die hantering van hulpversoeke. “Die nood was konstant,” sê sy. “Mense het selfs by die kantoor opgedaag.”
Haar geloof het haar gedra. “Sonder my geloof sou ek nie dieselfde deernis gehad het nie,” sê sy.
Een ervaring staan vir haar uit. “Dit het begin met iemand wat net oor kos gevra het,” sê sy. “Maar ons moes die gesprek skuif na bemagtiging.”
Sy onthou hoe moeilik dit was. “Dit het oortuiging geverg,” sê sy. “Maar dit was die regte ding.”
Die uitkoms was merkwaardig. “Twee projekte het daaruit gekom,” sê sy. “Albei was R750 000 sterker.”
Vir haar bevestig dit die organisasie se benadering. “Opheffing werk,” sê sy.
Strauss het altyd eerlik met mense gewerk. “Ek belowe om my beste te doen,” sê sy. “Maar nie die uitkoms nie.”
Sy glo dit bou vertroue. “Mense het geweet jy gee om,” sê sy.
Vir haar was die werk meer as net ’n taak. “Wat is lekkerder as om ander te help? Jy groei saam met hulle.”
Sy sien steeds die waarde van vrywilligerswerk vandag en help waar sy kan. “Jy hoef nie alles te doen nie,” sê sy. “Maar elke bydrae tel.”
Sy glo die stories is wat saak maak. “Dit is die stories van hoop wat bybly,” sê sy.
Haar boodskap is eenvoudig. “Hou aan opdaag,” sê sy. “Dit is hoe gemeenskappe gebou word.”
LEES MEER: Begrafnisondernemings gevra om liggame vinnig te verwyder
Het jy dalk meer inligting rakende dié storie?
Stuur gerus vir ons ‘n epos na bennittb@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram en TikTok en WhatsApp Channe
