Die Hoërskool Menlopark, wat die Titans vanjaar by die Coca-Cola T20 Skoletoernooi verteenwoordig het, is verlede week as die kampioene van dié toernooi gekroon toe hulle Hilton College van Durban in die finaal met ’n skamele twee lopies geklop het.

Menlopark het eerste gekolf in die eindstryd en danksy die bydraes van Thinus Viljoen (62) en Dean Foxcroft (40) kon hulle uiteindelik 125 lopies aanteken op ’n moeilike baanblad.

Die Durbaniete het hierna ’n geditermineerde poging aangewend om Menlopark se totaal te verbeter. Hulle het boonop baie naby daaraan gekom en die wedstryd het spannend geëindig toe Hilton College in die laaste boulbeurt sewe lopies moes aanteken om te wen.

Die Pretorianers het egter daarin geslaag om die manne van Hilton tot net vyf lopies te beperk. In dié boulbeurt het Dean Focroft weer uitgeblink met puik veldwerk, wat hom die toekenning as “Held van die dag” besorg het. Hy is ook aangewys as Man van die Wedstryd in die eindstryd, terwyl hy boonop nog die Speler van die Toernooi-trofee ook verower het.

Met hierdie oorwinning het Menlopark hul tweede titel in die Coca-Cola T20 Skoletoernooi gewen, nadat hulle in die 2010/11 seisoen ook die kampioene was.

Hulle het op pad na die eindstryd boonop die gunstelinge, Grey Kollege van Bloemfontein, met ses lopies in die halfeindstryd geklop.