Hoewel die Hoërskool Montana in verskeie opsigte uitgestaan het op verlede week se Jakaranda Interhoër (beter bekend as die A-bond interhoër), het ’n atleet van dié skool vir een van die beste vertonings op die byeenkoms gesorg.

Taylon Bieldt, ’n o.17 atleet en leerling van Hoërskool Montana het die dag met drie goue medaljes afgesluit, nadat sy die 100m hekkies, die 400m hekkies en die 400m naelloop in haar ouderdomsgroep gewen het.

In die 100m hekkies item het sy boonop ’n nuwe rekord opgestel toe sy dié item in 13,58 sekondes kafgedraf het.

Bieldt se prestasie het haar skool weer in die kollig geplaas, aangesien Montana die enigste openbare skool by dié top byeenkoms was wat nié uit die ooste of suide van Pretoria kom nie. Montana het boonop baie goed gevaar en in die sesde plek algeheel, slegs 45 punte agter Eldoraigne, geëindig.  Met hierdie prestasie het Montana weer bewys dat talentvolle kinders uit die noorde van Pretoria nie nodig het om na top skole in die ooste en suide van die stad te skuif om geleenthede teen die bestes op die sportveld te kry nie.

Montana sal vanjaar ook weer as ’n sogenaamde “Makro”-skool teen die bestes in die land aan wintersport deelneem.