Die afgelope naweek is net twee Carltonbeker wedstryde afgehandel, maar dit was genoeg om te bevestig dat Tukkies en Polisie waarsynlik wéér die twee spanne sal wees om te klop as enige ander klub aspirasies het om die eindstryd te haal.

Terwyl ’n effens verswakte span van Polisie met Oostelikes afgerekend het, het die studente hul toernooi begin met ’n reuse oorwinning teen Naka Bulle, waarin hulle sestien drieë ingeryg het.

* Die wedstryd tussen Polisie en Oostelikes se verloop en uitslag was goeie nuus vir die Carltonbeker liga, aangesien daar verwag is dat Oostelikse vanjaar ’n insinking sou beleef. Dié klub het verskeie van sy top spelers verloor en daar was ook veranderinge in sy bestuur.

Polisie, wat tans baie skerper en fikser as ander oopklubs behoort te wees weens hul deelname aan die Gemeenskapsbekerreeks, moes egter hard werk om Oostelikes uiteindelik met 34-25 te klop. Die Bobbies het vasgebyt en volpunte uit die wedstryd verdien deur ses drieë te druk. Die manne uit die ooste het self drie drieë gaan druk, terwyl hul betroubare losskakel, Morné van den Berg, tien punte met sy akurate skopvoet bygevoeg het.

* Tukkies, met verskeie Varsitybeker sterre in hul geledere, het Naka Bulle wreed ontnugter, nadat die manne van die Moot se veldtog aanvanklik nie te sleg begin het nie. Dit was eenrigting verkeer op Naka Bulle se tuisveld en die studente het ’n honderdtal net-net misgeloop met die eindtelling van 98-10.

Die Tuks Jongspan het selfs nog verder gegaan deur Naka Bulls se o.21’s met 120-0 te klop. ’n Mens kan net hoop dat die harde werk wat tans gedoen word deur die nuwe bestuur by die Blou Bulle resultate sal lewer en dat hierdie ongelykheid op top klubvlak metteryd uitgebalanseer sal word.

* Eerskomende naweek sal Polisie ’n loslootjie geniet, terwyl drie ander wedstryde in die Carltonbeker liga afgehandel sal word. Naka Bulle sal probeer herstel van hul pakslae teen Tukkies, maar hulle taak sal steeds moeilik wees teen Centurion, wat tans baie goeie rugby speel. Harlequins ontvang Oostelikes op hul tuisveld in ’n wedstryd wat vir albei dié klubs belangrik sal wees om hul krag te bepaal. Die wedstryd tussen Tukkies en TUT behoort ook interessant te wees, aangesien daar duidelik herlewing is by TUT se rugbyklub.